Fréttir‎ > ‎

Ásdís Sigurðardóttir nýr framkvæmdastjóri UMSE

posted Oct 24, 2017, 1:47 AM by Ungmennasamband Eyjafjarðar UMSE

Fréttatilkynning frá stjórn UMSE: 

Nú um næstu mánaðarmót tekur Ásdís Sigurðardóttir við starfi framkvæmdastjóra UMSE.  

Ásdís er frá Siglufirði en er búsett á Akureyri. Hún er með meistaragráðu í forystu og stjórnun frá Háskólanum á Bifröst en hefur einnig verið við nám í opinberri stjórnsýslu í Háskóla Íslands, lagt stund á markþjálfanám, verkefnastjórnun og leiðtogaþjálfun svo eitthvað sé nefnt. Hún hefur komið töluvert að íþrótta- og æskulýðsmálum gegnum tíðina bæði sem keppandi, þjálfari, kennari og verkefnastjóri. Auk fjölbreyttrar reynslu á sviði íþróttamála hefur hún einnig verið með sjálfstæðan rekstur, sinnt félagsmálum af miklum krafti og nú síðast verið umsjónarmaður Vinnuskóla Akureyrar og formaður frjálsíþróttadeildar KFA á Akureyri.  Stjórn UMSE býður Ásdísi velkomna til starfa.

Ásdís tekur við starfinu af Þorsteini Marinóssyni sem lætur nú af störfum hjá UMSE eftir 11 ára starf. Stjórn UMSE færir Þorsteini bestu þakkir fyrir allt hans mikla og góða starf í þágu UMSE og fyrir afar ánægjulegt samstarf á liðnum árum með ósk um að honum farnist vel á nýjum vettvangi. 

Comments